Oktyabrın 18-də Türkiyədə xarici işlər nazirlərinin “3+3” formatında növbəti görüşü keçirildi. Gürcüstanın növbəti dəfə görüşdə iştirak etməməsi, Ermənistanın isə iradəsizliyi formatın işinə pəl vuran amillərdəndir. Daha dəqiq desək, Azərbaycanla Ermənistan arasında sülh müqaviləsinin olmaması, Rusiya ilə Gürcüstan arasında diplomatik əlaqələrin sual altında qalması, həmçinin kommunikasiyalarla bağlı problemlərin aradan qaldırılmaması formatın tam işlək vəziyyətə düşməsinə əngəl yaradan əsas məqamlardan hesab olunur.
