Bir neçə gün əvvəl İspaniyada meydana gələn qasırğanın fəsadları durmadan artır. Hökumət təbii fəlakətin fəsadlarını aradan qaldırmaq üçün səfərbər olsa da, mülki binalara və infrastruktura dəyən zərər artmaqda davam edir. Təbii fəlakət fonunda İspaniyanın dövlət meteoroloji agentliyi Valensiyada qırmızı, Əndəlüsün bəzi yerlərində narıncı həyəcan siqnalı elan edib. Hətta bu hadisə 1967-ci ildə Portuqaliyada baş verən daşqınlardan sonra Avropada ən böyük fəlakət hesab olunur. Lakin problemin aradan qaldırılmaması xalqı daha da qəzəbləndirib. Yerli sakinlər əraziyə baş çəkən İspaniya Kralı VI Filipin üzərinə zibil və palçıq atıb, “qatil” şüarları səsləndiriblər. Çünki yerli sakinlər İspaniya hakimiyyətinin ölkədə baş verən daşqınlar səbəbindən yaranmış fəlakətlə mübarizə üsulundan narazıdırlar.
