Astronomlar “2024 YR4” adlı asteroidin dünya üçün potensial təhlükə yaratdığını açıqlayıblar.

“Qafqazinfo” “New York Post”a istinadən xəbər verir ki, bu göy cismi təkcə Yer planeti üçün deyil, hətta Ay üçün də təhlükəlidir.

Bu barədə Arizona Universitetinin nəzdində “Katalina” Səma Tədqiqat Mərkəzinin üzvü Dr. Devid Renkin “Bluesky” sosial media platformasındakı paylaşımında bildirib: “2024 YR4-un Yerlə toqquşma ehtimalı 2 faizdən bir qədər çoxdur”.

Renkinin hesablamalarına görə, İtaliyada yerləşən Piza qülləsi böyüklüyündə olan bu asteroidin 2032-ci il dekabrın 22-də Yerlə toqquşma ehtimalı 48-də bir ola bilər.

Alimlərin fikrincə, bu göy cismi Yerə dəysə, 8 meqatonluq partlayış baş verəcək. Bu da Xirosimaya atılan atom bombasından 343 dəfə böyük dağıntı deməkdir.

Bildirilir ki, partlayış Vaşinqton qədər böyük bir ərazini məhv edə bilər.

ABŞ Kosmik Agentliyi NASA “2024 YR4”dan gələ biləcək təhlükəni daha yaxşı analiz edə bilmək üçün dünyanın ən güclü teleskopu olan “Ceyms Uebb”dən istifadə etmək qərarına gəlib. Bu teleskop asteroidin ölçüsünü və potensial təsirini daha aydın ölçmək üçün infraqırmızı cihazlarla araşdırma aparacaq.

20 fevral 2025

Mənbə: qafqazinfo.az