Cənubi Koreyanın Korrupsiyaya Qarşı Mübarizə üzrə İstintaq İdarəsi Prezident Yun Sok Yola qarşı həbs qərarının icrasını polisə həvalə edib.

“Qafqazinfo” xarici KİV-ə istinadən xəbər verir ki, bu barədə Koreya Respublikasının Korrupsiyaya Qarşı Mübarizə üzrə İstintaq İdarəsi məlumat yayıb.

Bildirilib ki, qurumun tələbi ilə order müddəti bu gün sona çatır.

***

“Yonhap” agentliyinin məlumatına görə, Cənubi Koreya polisi isə Yun Sok Yolun həbsinə dair orderin tətbiqini üzərinə götürməkdən imtina edib.

Bildirilib ki, sözügedən məsələnin polisə həvalə edilməsində hüquqi baxımdan mübahisəli detallar var və idarə ilə məsləhətləşmələr davam etdiriləcək. 

Xatırladaq ki, ötən il dekabrın 31-də Cənubi Koreya məhkəməsi Korrupsiyaya Qarşı Mübarizə üzrə İstintaq İdarəsinin tələbi ilə prezidentin həbsinə order vermişdi. Yanvarın əvvəli isə Yun Sok Yolun iqamətgahı önündə birgə istintaq qrupunun nümayəndələri ilə prezidentin mühafizə qüvvələri arasında qarşıdurma yaşanıb.

Belə ki, istintaq qrupu impiçmentlə səlahiyyətlərinin icrasından müvəqqəti uzaqlaşdırılan Yun Sok Yolu qiyam işi üzrə həbs etmək üçün iqamətgahına yaxınlaşdıqda dövlət başçısını mühafizə edən hərbçilər onların qarşısını kəsib. İstintaq qrupunun nümayəndələri yanvarın 3-də ərazini tərk ediblər.

06 yanvar 2025

Mənbə: qafqazinfo.az