“Estetik Kosmetologiya Mütəxəssisləri” (EKM) İctimai Birliyin sədri, həkim dermatoloq, həkim-kosmetoloq Rəna Soltanovanın rəhbərliyi ilə hazırlanmış nizamnamənin prinsiplərinə uyğun olaraq, dürüstlük, insanpərvərlik və xeyirxahlıq kimi keyfiyyətlərlə fəaliyyət göstərməyə davam edir.

Şəhid ailələri, müharibə iştirakçıları və ümumilikdə cəmiyyətin həssas təbəqəsinə mənsub olan insanlara dəstək olmaq mənəvi borcdur.

Şəhidlərimiz və qazilərimiz vətənin müstəqilliyi və azadlığı uğrunda canlarını fəda ediblər. Dövlətimiz onların ailələrini hərtərəfli qayğı ilə əhatə edib. Vətəndaş cəmiyyəti olaraq biz də şəhid ailələrinə və qazilərimizə diqqət göstərməliyik. Şəhid analarını ziyarət edərkən onların hər biri bildirib ki, “bizim heç nəyə ehtiyacımız yoxdur, yetər ki, balamızı unutmasınlar, bizi yad etməklə onları yada salmış olursunuz, bununla da ürəyimizə su səpirsiniz”.

Onu da qeyd etmək lazımdır ki, Rəna xanımın yaradıcısı və baş həkimi olduğu “LBC” estetik klinikada və filialında “Xatirə ağacları” var ki, orada şəhərimizin şəhidlərinin şəkli yer alıb. Pasiyentlər onların yaxından tanıdıqları şəhidlərin şəkillərini görəndə qürur hissi keçirirlər. Bu, xarici ölkələrdən gələn pasiyentlər və qonaqlara da xoş gəlir.

EKM-çilər tərəfindən “Yaşıl dünya naminə həmrəylik ili” çərçivəsində Masazır qəsəbəsində 3 şəhid ailəsinin yaşadıqları binaların həyətində 50 ədəd zeytun və şam ağaclarının əkilməsi də yaddaqalan və insanlara sevinc gətirən bir gün oldu. Ərazi təsadüfi seçilməmişdi. Masazırda 3 şəhid ailəsinin yaşadığı binaların həyətyanı sahəsində əkilən ağaclar illər keçdikcə öz bəhrəsini verəcək, orada yaşayan uşaqlara da örnək olacaq.

EKM İctimai Birliyinin (EKMİB) layihəsi olan “0-dan peşə  öyrən və inkişaf etdir” tədris kursunu müvəffəqiyyətlə bitirmiş və hazırda təcrübə üçün davamlı klinikaya gələn Lalə xanım şəhid Bayramov İlyas İsa oğlunun qızıdır.

Tibb təhsili tələb etməyən kosmetologiyanın bir neçə peşəsini öyrənən və tətbiq edən şəhid və qazi ailələrinin xanımları, əlil arabasında dərsə nizamlı şəkildə gələn Minarə xanımı və Lamiyə xanımın gülər üzünü görmək insanı o qədər xoşbəxt edir ki…

EKMİB-in “Xankəndi, Füzuli və Beyləqan rayonlarında kosmetoloq peşəsinin tədrisi” layihəsi hazırdır və uyğun bir zamanda həyata keçirilməsi planlaşdırılır.

Göründüyü kimi, bu kateqoriyadan olan insanların ən çox mənəvi dəstəyə ehtiyacları var. EKM İctimai Birliyi bu amal ilə müxtəlif layihələr həyata keçirir, ehtiyacı olan insanların yanında olur və onların səsinə səs verir.

Rəna xanım hər zaman həssas qruplara aid olan insanların yanında olmağa səy göstərir. O, mütəmadi olaraq valideynlərini itirmiş uşaqların qaldığı sığınacağa və zorakılığa məruz qalmış qadınlara, xəstə uşağı ilə mücadilə edən tənha analara baş çəkərək onlara dəstək olur.

R.Soltanova bildirib: “Biz inanırıq ki, birlikdə daha güclüyük” prinsipi ilə fəaliyyət göstərən EKM İctimai Birliyi bundan sonra da həssas təbəqədən olan insanların yanında olmağa və onlara dəstək olmağa niyyətlidir. EKM İctimai Birliyi olaraq, bu müqəddəs missiyanı davam etdirməkdə qətiyyətliyik.

Bu, sadəcə bizim deyil, bütün cəmiyyətin məsuliyyətidir. Bu missiyanı daha böyük miqyasda həyata keçirmək üçün hər kəsi həmrəylik nümayiş etdirməyə dəvət edirik”.

10 yanvar 2025

Mənbə: qafqazinfo.az