Afrika Çempionlar Liqasında “Əl-Hilal” (Sudan) - “Alger” (Əlcəzair) matçından sonra maraqlı hadisə yaşanıb.

“Qafqazinfo” xəbər verir ki, sözügedən görüşün 5-ci dəqiqəsində “Alger”dən Sofian Bayazid hesabı açıb.  “Əl-Hilal”ın futbolçusu Can Klod Qirumuqişa isə 78-ci dəqiqədə bərabərlik qolunu vurub. Matç 1:1 hesabı ilə yekunlaşıb.

Nəticədə “Əl-Hilal” A qrupunda xallarının sayını 10-a çatdırıb və növbəti mərhələyə vəsiqəni təmin edib.

Lakin böyük pulların olduğu Avropanın futbol bazarından fərqli olaraq, həmin matçdan sonra Can Kloda verilən mükafat hər kəsi təəccübləndirib. Burundili hücumçu əhəmiyyətli qoluna görə cəmi 100 dollar mükafat alıb.

Bu barədə sosial şəbəkə hesablarında paylaşımlar edilib. Can Klod həmin 100 dolları əlində tutaraq şəkil çəkdirib və bu foto sosial mediada gündəm olub. 

06 yanvar 2025

Mənbə: qafqazinfo.az