Bakı şəhər Qaradağ rayonunda “BakuBus” avtobusu ağır qəza törədib.

Bu haqda “Qafqazinfo”ya Baş Dövlət Yol Polisi İdarəsinin inspektoru, polis baş leytenantı Elvin Hacıyev bildirib.

O qeyd edib ki, hadisə bu gün saat 10:30 radələrində Bakı-Qazax yolunun 24-cü kilometrliyində baş verib.

“99 JZ 185 nömrəli “BakuBus” avtobusu yolun kənarında durmuş Tacikistanın 77 FF 02 nömrəli “Volvo Tır” markalı avtomobili ilə toqquşub. İlkin məlumata görə, “BakuBus”un sərnişinlərindən biri həyatını itirib”, - deyə E.Hacıyev bildirib.

***

AYNA qəza ilə bağlı açıqlama yayıb.

“Bu gün səhər saatlarında Bakı-Ələt yolunda Sahil qəsəbəsini “Sahil” metrostansiyası ilə əlaqələndirən 149 nömrəli avtobusun iştirakı ilə qəza baş verib. Hadisə hüquq-mühafizə orqanları tərəfindən araşdırılır. İctimaiyyətə əlavə məlumat veriləcək”, - məlumatda qeyd olunub.

***

Kliniki Tibbi Mərkəzin mətbuat katibi Ruzbeh Məmməd saytımıza açıqlamasında bildirib ki, qəzada 1982 və 1999-cu il təvəllüdlü şəxslər (qadın cinsli) başın açıq yarası, belin yüngül əzilməsi, fəqərə sınığı diaqnozları ilə KTM-in Təcili və Təxirəsalınmaz Tibbi Yardım şöbəsinə hospitalizasiya edilib.

Yaralılara ilkin tibbi yardım göstərilib və zəruri tibbi müayinələrdən keçirilib. Hazırda vəziyyətləri stabil qiymətləndirilir.

04 yanvar 2025

Mənbə: qafqazinfo.az