ABŞ-nin yeni seçilmiş Prezidenti Donald Trampın Qrenlandiya ilə bağlı bəyanatı yenidən müzakirə mövzusuna çevrilib.

“Qafqazinfo”nun məlumatına görə, “Qrenlandiya inanılmaz bir yerdir və o, ölkəmizin bir hissəsi olarsa, xalqı bundan böyük fayda görəcək. Biz onu pis xarici aləmdən qoruyub qoruyacağıq”, - deyə Tramp “Truth Social” sosial şəbəkə hesabında yazıb.

O, Qrenlandiyalıların MAGA (Make America Great Again - Amerikanı Yenidən Böyük Edək) hərəkatını dəstəklədiyini iddia edib.

Çox keçmədən Trampın oğlu Kiçik Tramp Qrenlandiya səfər edib. Donald Tramp özü də səfər xəbərlərini təsdiqləyib. Həmçinin oğlunun adaya səfərindən fotolarını paylaşıb.



Lakin Kiçik Trampın şəxsi bloqu üçün video çəkilişləri həyata keçirmək məqsədilə adada yalnız bir gün keçirəcəyi, Qrenlandiya hökumət nümayəndələri və ya yerli siyasətçilərlə heç bir görüş planlaşdırmadığı bildirilib.



Bu məqamda Danimarkanın Baş naziri Mete Frederiksen Donald Trampın Qrenlandiya ilə bağlı bəyanatına cavab verib.

“Qrenlandiya satılmır. Qrenlandiyanın gələcəyini başqası deyil, qrenlandiyalıların özlərinin müəyyənləşdirməsi vacibdir”, - deyə danimarkalı siyasətçi TV2-yə verdiyi müsahibəsində bildirib.

Qeyd edək ki, Tramp 2024-cü ilin dekabrında Qrenlandiyanın ilhaqını “mütləq zərurət” adlandırıb, bunu ABŞ-nin milli təhlükəsizliyi ilə əlaqələndirib.

08 yanvar 2025

Mənbə: qafqazinfo.az